Мемлекет басшысының айтуынша, бүгінде қолданыстағы заңнамаларды Конституция талаптарына сәйкестендіру жұмыстары жүргізіліп жатыр. Алдағы кезеңде Құрылтай сайлауы өткізіліп, Халық кеңесі құрылмақ.
Президент қазіргі уақытта Парламентте «Жергілікті мемлекеттік басқару және өзін-өзі басқару туралы» заңға өзгерістер енгізу мәселесі қаралып жатқанын айтты.
«Бұл өзгерістер күшіне енген соң мәслихаттардың ықпалы артады. Аймақтағы депутаттар бюджетті бөлуге тікелей араласатын болады», – деді Мемлекет басшысы.
Оның айтуынша, бұл қадам өңірлердегі өкілді билік органдарының бақылау тетіктерін күшейтіп, жергілікті басқару жүйесінің тиімділігін арттыруға мүмкіндік береді.
«Соның нәтижесінде облыстар мен қалалардағы жергілікті өкілді биліктің бақылау тетіктері күшейеді. Бұл маңызды қадам аймақтардың дербестігін арттыра түседі», – деді Президент.
Қасым-Жомарт Тоқаев Қонаев қаласының облыс орталығы мәртебесін алғанына биыл төрт жыл толатынын еске салып, осы уақыт аралығында қалада ауқымды жұмыстар атқарылғанын атап өтті.
Президенттің айтуынша, бүгінде Қонаев біртіндеп әкімшілік, туристік және іскерлік орталық ретінде қалыптасып келеді.
«Шаһарда ауқымды жұмыс істеліп жатыр. Қала біртіндеп әкімшілік, туристік және іскерлік орталық ретінде қалыптасуда», – деді Мемлекет басшысы.
Сонымен қатар Президент Алматы облысының әлеуметтік-экономикалық әлеуеті жоғары екенін және өңірге инвесторлардың қызығушылығы артып келе жатқанын жеткізді.
«Жалпы, Алматы облысының өсіп-өркендеуі үшін барлық мүмкіндік бар. Өңірге инвесторлар назар аудара бастады», – деді ол.
Қасым-Жомарт Тоқаев Қонаев және Алатау қалаларының дамуы өңірдің өркендеуіне жаңа серпін беретінін атап өтті.
«Қонаев пен Алатау қалаларының дамуы аймақтың көркеюіне зор серпін бермек. Біз күш-жігерімізді біріктіріп, белсенді жұмыс істесек, барлық мақсатқа жетеміз», – деді Президент.
Сөз соңында Мемлекет басшысы өңірдің дамуына үлес қосып жүрген азаматтарға алғыс білдіріп, олардың еңбегін жоғары бағалады.
«Сіздер Алматы облысының дамуына және еліміздің өркендеуіне мол үлес қосып келесіздер. Баршаңызға шынайы ризашылығымды білдіремін», – деді Қасым-Жомарт Тоқаев.
