Оқиға Бостандық ауданындағы Көкжайлау шатқалы аумағында болған. Таудан түсіп келе жатқан туристік топтың бір мүшесі артта қалып қойған. Оның серіктері бірнеше рет хабарласуға тырысқанымен, ұялы телефоны өшірулі болғандықтан байланысқа шыға алмаған.
Туристер жоғалған азаматты өз бетімен таба алмаған соң, түнгі уақытта құтқарушылардан көмек сұраған.
ТЖМ мәліметінше, іздестіру-құтқару жұмыстарына «Барыс» республикалық жедел-құтқару жасағының мамандары жұмылдырылды.
«Құтқарушылар оқиға орнына жедел жетіп, таулы аумақты тексеруге кірісті. Іздестіру жұмыстары түнгі уақытта, көріну мүмкіндігі шектеулі жағдайда жүргізілді. Нәтижесінде Көкжайлау шатқалынан төмен орналасқан аумақтан туристік топтан қалып қойған Иран Республикасының азаматы, студент жігіт табылды», – делінген ведомство таратқан хабарламада.
Белгілі болғандай, жас жігіт тау беткейінде ұйықтап жатқан. Құтқарушылар оны тауып, жағдайын тексерген.
Медициналық тексеру барысында студенттің денсаулығына ешқандай қауіп жоқ екені анықталды. Оған медициналық көмек қажет болмаған.
Құтқарушылар шетелдік азаматты қауіпсіз жерге жеткізіп, таудан аман-есен түсірді.
ТЖМ өкілдері тұрғындар мен туристерге тауға шығар алдында бағытты алдын ала жоспарлап, байланыс құралдарының қуатын тексеруге және топтан бөлінбеуге кеңес береді.
