Білім ошақтары Мемлекет басшысы Қасым-Жомарт Тоқаев бастамасымен жүзеге асырылып жатқан «Келешек мектебі» ұлттық жобасы аясында салынған. Үш ауысымды оқыту жүйесін жою мақсатында өңірде барлығы 26 мектептің құрылысы жоспарланған. Оның 7-еуі Талғар ауданында бой көтерген.
Салтанатты шараға облыс әкімінің орынбасары Ғани Майлыбаев қатысып, аймақ басшысы Марат Сұлтанғазиевтің құттықтауын жеткізді.
«Біздің ең басты байлығымыз – өскелең ұрпақ. Сондықтан мемлекет тарапынан балалардың сапалы білім алып, жан-жақты дамуына барлық жағдай жасалуда. Қазіргі заманда білім – тұтас ұлттың бәсекеге қабілеттілігін айқындайтын негізгі фактор», – деді ол.
Жалқамыс ауылында ашылған мектептің жалпы аумағы 9 мың шаршы метрді құрайды. 600 орынға арналған білім ордасында алдағы уақытта 900-ден астам оқушы екі ауысымда білім алады. Ал Жібек жолы ауылындағы мектеп 900 оқушыға есептелген, оның аумағы 10 мың шаршы метр.
Екі мектеп те заманауи технологиялармен, STEM-зертханалармен және инклюзивті құралдармен жабдықталған. Сонымен қатар оқушылардың спортпен және шығармашылықпен айналысуына барлық жағдай қарастырылған.
Жергілікті тұрғындар жаңа мектептердің ашылуын үлкен қуанышпен қарсы алды.
«Жалқамыс – менің туған ауылым. Бұрын балаларымыз ескі мектепте оқыса, енді немерелеріміз заманауи білім ордасында білім алады. Бұл – біз үшін үлкен қуаныш», – деді ауыл тұрғыны Роза Әділова.
Ал Жібек жолы ауылының тұрғыны Бауыржан Баймағұлов бұл оқиға ауыл үшін маңызды екенін атап өтті.
«Көптен күткен мектеп ашылды. Енді балаларымыз жайлы жағдайда білім алады. Болашақта осы мектептен елге қызмет ететін білікті мамандар шығады деп сенемін», – деді ол.
Алматы облыстық білім басқармасының мәліметінше, өңірде бүгінде 443 мектеп жұмыс істейді, онда 360 мыңнан астам оқушы білім алуда. Жыл соңына дейін «Келешек мектебі» бағдарламасы аясында тағы 9 мектеп пайдалануға беріледі. Сонымен қатар тағы 9 білім беру нысанының құрылысы басталады.
