Ауыл әкімі Бақытжан Жайламысовтің айтуынша, шара «Таза Қазақстан» бағдарламасы аясында ұйымдастырылған.
«Акцияға ақсақалдардан бастап, жастар мен түрлі мекеме қызметкерлері қатысты. Бұл — тұрғындардың ауызбіршілігінің, туған жерге деген жанашырлығының көрінісі. Алдағы уақытта жол жиегіне қайың ағаштарын отырғызу жоспарда бар. Жалпы, бұл бағыттағы жұмыстар жүйелі түрде жалғасады», – деді ауыл әкімі.
Айта кетейік, жыр алыбы Жамбыл Жабаев осы мұражай маңында жерленген. Сондай-ақ оның жанында белгілі күйші, композитор Нұрғиса Тілендиевтің де мәңгілік мекені орналасқан.
Мұражай қызметкерлерінің мәліметінше, бұл орынға еліміздің әр өңірінен және шетелден келетін қонақтар көп. Сондықтан табиғатты қорғауға бағытталған мұндай шаралардың маңызы зор.
Акцияға қатысқан тұрғындардың бірі Шолпан Ахмедиева бұл бастаманың тек ағаш отырғызумен шектелмейтінін атап өтті.
«Бұл – жай ғана экологиялық акция емес, жыр алыбының рухына көрсетілген құрмет. Осындай игі іске үлес қосқаныма қуаныштымын», – деді ол.
