Ресми дерекке сәйкес, 2026 жылғы 1 қаңтарда ел халқы 20 499 822 адам болса, 1 наурызда бұл көрсеткіш 20 532 240 адамға жеткен. Осылайша халық саны екі айда 32 418 адамға артқан.
Өсімнің негізгі бөлігі табиғи өсім есебінен қалыптасқан – 28 835 адам. Ал көші-қон сальдосы 3 583 адамды құрады.
Жалпы, Қазақстанда халықтың басым бөлігі қалаларда тұрады – 13 миллионнан астам адам. Ауылдық жерлерде 7,4 миллионнан астам тұрғын бар.
Алматы облысы да халық саны өсіп келе жатқан өңірлер қатарында. Аймақта урбанизация мен көші-қон үрдістері белсенді жүріп, жаңа инфрақұрылым мен тұрғын үй құрылысы қарқынды дамып келеді.
Ел бойынша ең көп халық Алматы қаласында тіркелген – 2,3 миллионнан астам адам. Одан кейін Түркістан облысы мен Астана қаласы келеді. Ал ең аз тұрғын Ұлытау облысында – шамамен 219 мың адам.
Айта кетейік, 2025 жылы Қазақстанда 335 мыңға жуық бала дүниеге келген. Сонымен қатар халықтың өмір сүру ұзақтығы да артып келеді. 2025 жылы бұл көрсеткіш 75,97 жылды құраса, 2024 жылы 75,44 жыл болған.
Мамандардың пікірінше, халық санының өсуі өңірлердің әлеуметтік-экономикалық дамуына тікелей әсер етеді.
