Оқиғаның видеосы әлеуметтік желілерде тарады. Кадрларда айқайлап, бірін-бірі қуып жүрген жастар тобы көрінеді. Кейбірінің оқиға орнына көлікпен келгені байқалады. Полиция аспанға оқ атқан сәтте, қатысушылардың бір бөлігі көліктеріне отырып, асығыс кетіп қалған.
https://www.instagram.com/reel/DWeDe29ii2v/?utm_source=ig_web_copy_link&igsh=NTc4MTIwNjQ2YQ==
Алматы облысы полиция департаменті бастығының тергеу жұмыстары жөніндегі орынбасары Рустам Абдрахманов бұл жағдай 2026 жылғы 28 наурызда Еңбекшіқазақ ауданы аумағында болғанын мәлімдеді.
Оқиғаға байланысты бұзақылық және полиция қызметкерлеріне қарсылық көрсету фактілері бойынша екі қылмыстық іс тіркелді.
«Жеті адам күдікті ретінде танылды. Олардың барлығы ұсталып, уақытша ұстау изоляторына қамалды. Полиция қызметкерлері қоғамдық тәртіптің бұзылуына жол бермеу үшін аспанға ескерту ретінде оқ атты. Қазіргі уақытта сотқа дейінгі тергеу жалғасып жатыр», – деді Абдрахманов.
Ведомство мәліметінше, тергеу амалдары Алматы облысы полиция департаментінің үйлестіруімен Еңбекшіқазақ аудандық полиция басқармасы қызметкерлері тарапынан жүргізіліп жатыр.
«Тергеу барысы ерекше бақылауға алынды», – деп атап өтті ол.
