Мамандардың мәліметінше, Алматы облысы аумағында ауа райы күрт өзгеріп, кей жерлерде қатты жауын-шашын мен жел күтіледі. Облыстың оңтүстігінде кей уақыттарда жаңбыр мен қар түрінде қатты жауын-шашын болуы мүмкін. Ал тау бөктері мен таулы аудандарда қардың қалың түсуі ықтимал.
Сонымен қатар, өңірдің солтүстігінде, оңтүстігінде және таулы аймақтарында тұман түсіп, көктайғақ болады деп күтіледі. Солтүстік-шығыстан соғатын желдің екпіні кей жерлерде секундына 17–22 метрге дейін жетуі мүмкін.
Ал Қонаев қаласында да тұман мен көктайғақ болжанып отыр. Мұнда желдің екпіні секундына 17–22 метрге дейін күшеюі мүмкін.
Іле Алатауы аумағында, оның ішінде Алматы қаласының Медеу және Бостандық аудандарының таулы бөліктерінде 6 наурызға қараған түні кей уақыттарда қатты қар жауады деп күтіледі.
Сондай-ақ бұл өңірлерде тұман түсіп, көктайғақ болуы мүмкін. Желдің жылдамдығы солтүстік-шығыстан соғып, екпіні секундына 17–22 метрге дейін жетеді.
