Іс-шара «Тәуелсіздік ұрпақтары» гранты аясында жүзеге асырылып жатқан медиа бағыттағы әлеуметтік жоба шеңберінде өтті. Аталған жоба мемлекеттік қызметшілер мен бұқаралық ақпарат құралдары өкілдері арасындағы өзара түсіністік пен кәсіби қарым-қатынасты нығайтуға бағытталған.
Тренинг барысында қатысушылар журналистермен дұрыс байланыс орнату, сұхбат беру мәдениеті, ақпараттық сауаттылық, сондай-ақ әлеуметтік желілерде кәсіби имидж қалыптастыру жолдары бойынша теориялық және практикалық білім алды. Оқыту курсы үш кезеңнен тұрады: теория, тәжірибе және қорытынды есеп.
Жобаның нысаналы аудиториясы – аудан және ауыл әкімдері, басқарма мен бөлім басшылары, сондай-ақ мемлекеттік органдардың баспасөз қызметі мамандары. Ұйымдастырушылардың айтуынша, қазіргі ақпараттық қоғамда мемлекеттік қызметшілердің журналистермен кәсіби тіл табыса алмауы қоғамда теріс пікір қалыптастыруы мүмкін. Осыған байланысты медиа сауаттылықты арттыру – билік пен халық арасындағы ашық диалогты нығайтудың маңызды құралы.
«Бұл жобаның басты мақсаты – мемлекеттік қызметшілерге журналистің жау емес екенін түсіндіру, ашық әрі сенімді қарым-қатынас орнатуға үйрету. Көп жағдайда сұхбаттан қашу немесе ойды дұрыс жеткізе алмау кейін өзіне кері әсерін тигізіп жатады. Ал дұрыс құрылған диалог екі тарапқа да тиімді», – дейді жоба жетекшісі Мөлдір Иманмәди.
Оның айтуынша, жоба бір жыл ішінде жүзеге асырылады. Жалпы саны 12 оқу сабағы жоспарланған, әр тренингке 15–20 адам қатысады. Нәтижесінде 200-ден астам мемлекеттік қызметші қамтылмақ. Жоба аясында «Журналист – жау емес» атты әдістемелік кітап әзірлеу жоспарланып отыр.
Тренингтер Алматы облысының Қонаев қаласында және облысқа қарасты өзге де қалалар мен аудандарда өткізіледі.
