Ақпаратқа сәйкес, өңірдегі дағдарыс 2026 жылғы 28 ақпанда Израиль мен АҚШ-тың Иран астанасына жасаған жойқын соққысынан кейін ушыққан. Шабуыл салдарынан Иранның жоғарғы көсемі аятолла Әли Хаменеи қаза тапқаны хабарланды. Бұған жауап ретінде Иран тарапы АҚШ-тың аймақтағы базалары мен Израиль аумағына зымырандық соққы жасаған.
Қазіргі уақытта Таяу Шығыс үстіндегі әуе кеңістігі жабық. Бұл халықаралық әуе қатынасының уақытша тоқтауына әкелді.
БАӘ аумағында негізінен қысқа мерзімге іссапармен немесе демалысқа келген Қазақстан азаматтары қалып қойғаны айтылды. Елге қайту мүмкіндігі болмағандықтан, олардың бір бөлігі уақытша тұру және өзге де тұрмыстық мәселелер бойынша көмекке мұқтаж.
Қазақстанның БАӘ-дегі Елшілігі Instagram желісіндегі ресми парақшасында жергілікті жерде тұрып жатқан отандастарға үндеу жариялады.
«Егер сізде мүмкіндік болса (уақытша орналастыру, тамақтандыру немесе өзге де маңызды көмек), төменде көрсетілген байланыс нөмірлеріне хабарласуыңызды сұраймыз. Сондай-ақ қиын жағдайда қалған отандастар туралы ақпарат білсеңіз, дипломатиялық миссияға хабарлауыңызды өтінеміз», – делінген хабарламада.
Жедел байланыс нөмірлері
Көмек көрсетуге дайын немесе көмекке мұқтаж азаматтар үшін шұғыл желілер іске қосылды.
Әбу-Дабидегі ҚР Елшілігі:
+971 50 508 5226
+971 2 449 8778
Дубайдағы ҚР Бас консулдығы:
+971 50 570 1978
+971 4 547 5784
Email: dubaimfakz@gmail.com
Қосымша ақпарат пен ресми мәлімдемелер елшіліктің әлеуметтік желідегі парақшаларында жарияланып жатыр.
