Ведомство мәліметінше, биыл 13 ақпанда Еңбекшіқазақ ауданының полициясына 31 жастағы әйел жүгінген. Оның айтуынша, 2025 жылдың күзінен бастап белгісіз ер адам оны тұрақты түрде аңдып, қоңырау шалып, түрлі хабарламалар жіберген. Сондай-ақ әйелге қатысты қорқыту сипатындағы сөздер айтылған.
Аталған дерек бойынша Қазақстан Республикасы Қылмыстық кодексінің 115-1-бабы («Сталкинг») негізінде қылмыстық іс тіркелді. Жедел-іздестіру іс-шаралары барысында 35 жастағы күдікті анықталып, ұсталды. Ол өз кінәсін толық мойындаған.
Полицияның хабарлауынша, тергеу бөлімшесінің үйлесімді жұмысының нәтижесінде іс қысқа мерзімде — 2 сағат 35 минут ішінде аяқталып, сотқа жолданған.
Сот шешімімен күдікті кінәлі деп танылып, оған 60 сағат қоғамдық жұмысқа тарту жазасы тағайындалды.
