Ресми ақпаратқа сәйкес, оқиғалардың үшеуі жеке тұрғын үйде, біреуі көпқабатты үйде болған. Осыған байланысты 12 ақпаннан бастап арнайы комиссия мүшелері тұрғын үйлерді аралауды бастайды.
Комиссия №1, 2, 3, 4, 5 және «Ивушка», «Спутник» шағынаудандарындағы пәтерлердің газға қосылу жағдайын тексереді. Егер газ желісі тартылған көпқабатты үйлерде кейбір пәтерлердің көгілдір отынға қосылмағаны анықталса, тұрғындарға кемшіліктерді жою үшін уақыт беріледі. Белгіленген мерзімде талап орындалмаса, азаматтар Қазақстан Республикасы Әкімшілік құқық бұзушылық туралы кодексінің 306-бабына сәйкес әкімшілік жауапкершілікке тартылады.
Әкімдік өкілдерінің айтуынша, бұл шаралар газ қауіпсіздігін күшейтіп, төтенше жағдайлардың алдын алуға бағытталған. Мәселен, 28 қаңтар күні 1-шағынаудандағы №3 үйдің 4-қабатындағы пәтерде газ-ауа қоспасы жарылып, екі адам зардап шеккен. Осы оқиғаға байланысты Қонаев қалалық полиция басқармасы Қылмыстық кодекстің 306-бабының 2-бөлігі бойынша іс қозғап, сотқа дейінгі тергеп-тексеру жүргізіп жатыр.
Заңнамаға сәйкес, қауіпсіздік талаптарын бұзған жеке немесе заңды тұлғаларға 5000 АЕК-ке дейін айыппұл салу, белгілі бір қызметпен айналысу құқығынан айыру, қоғамдық жұмыстарға тарту немесе бес жылға дейін бас бостандығын шектеу не айыру жазасы қарастырылған.
Әкімдік мәліметінше, көпқабатты үйдегі жарылыс бірнеше пәтердің газ жүйесіне қосылмауына байланысты орын алған. Комиссия жұмысының негізгі мақсаты — осындай жағдайлардың алдын алу.
Ал жеке тұрғын үйлерге қатысты тексеріс жүргізу әкімдіктің құзыретіне кірмейді. ҚР «Газ және газбен жабдықтау туралы» заңына сәйкес, бір қабатты үйлерде сұйытылған мұнай газын пайдалануға тыйым салынбаған.
Мамандар тұрғындарды өрт қауіпсіздігі талаптарын қатаң сақтауға шақырады. Газ құрылғыларын уақытылы тексеріп, баллондарды дер кезінде ауыстыру, сондай-ақ автогазды тұрмыстық мақсатта пайдаланбау қажеттігі ескертілді.
