Соттың баспасөз қызметінің мәліметінше, 2026 жылғы 15 қаңтар күні шамамен сағат 20:00-де бойжеткен TikTok парақшасында өзін алып қашып, мәжбүрлі түрде тұрмысқа шығармақ болды деген мазмұндағы жалған бейнежазба жариялаған.
Аталған видео қысқа уақыт ішінде әлеуметтік желілерде кеңінен тарап, қоғамда үлкен резонанс тудырған.
«Сот отырысы барысында К. есімді азаматша өз кінәсін толық мойындап, бейнежазбаны тек қаралым жинау мақсатында жариялағанын және жасаған әрекетіне өкініш білдіретінін айтты», – деп мәлімдеді Қарасай ауданаралық мамандандырылған әкімшілік құқық бұзушылықтар жөніндегі сот.
Сот шешімімен азаматша кінәлі деп танылып, 20 айлық есептік көрсеткіш мөлшерінде айыппұл салынды. Құқық бұзушылықтың алғаш рет жасалғаны және айыпталушының шын өкінгені ескеріліп, айыппұл сомасы 30 пайызға азайтылды.
Нәтижесінде блогер қыз 60 550 теңге көлемінде айыппұл төлеуге міндеттелді.
Айта кетейік, сот қаулысы әзірге заңды күшіне енген жоқ.
