Жаңа бағыт Мәжіліс депутаттарының бастамасымен, Көлік министрлігі мен Жолаушылар тасымалы АҚ-ның бірлескен жұмысы аясында, сондай-ақ азаматтардың өтініштері ескеріле отырып ашылмақ.
Ведомство мәліметінше, бастапқы кезеңде ұлттық тасымалдаушы тарапынан екі жолаушылар вагоны бөлінеді. Олар №122/121 «Нұрлы жол – Семей» пойызының құрамында күн ара қатынайды. Ақтоғай станциясында бұл вагондарды №631/632 «Ақтоғай – Талдықорған» пойызына қайта тіркеу жоспарланған. Бұл шешім бүкіл маршрут бойымен үздіксіз әрі ыңғайлы қатынасты қамтамасыз етуге мүмкіндік береді.
«Жолаушылар тарапынан тұрақты сұраныс болған жағдайда вагондар саны мен қатынау жиілігі кезең-кезеңімен ұлғайтылатын болады», – деп мәлімдеді Көлік министрлігінде.
Астанадан Талдықорғанға алғашқы пойыздың сәуір айында жүруі жоспарланып отыр. Бұл сапар Талдықорған қаласындағы жаңғыртылған теміржол вокзалының салтанатты ашылуымен тұспа-тұс келмек.
Ведомствоның пайымдауынша, жаңа теміржол қатынасы өңірлер арасындағы әлеуметтік-экономикалық байланыстарды нығайтуға, тұрғындардың мобильділігін арттыруға, ішкі туризм мен іскерлік белсенділікті дамытуға, сондай-ақ Жетісу облысының туристік тартымдылығын күшейтуге ықпал етеді.
