Ведомство мәліметінше, 23 қаңтар күні өңір аумағында «РФ шекарасы — Мартук — Ақтөбе — Қарабұтақ — Қызылорда — Шымкент — Тараз — Қордай — Алматы — Қорғас — ҚХР шекарасы» республикалық маңызы бар автожолының «Қордай асуының жаңа айналма жолы» учаскесі жабылды. Атап айтқанда, 59–143 шақырым аралығы (Жаңақұрылыс ауылы — Жамбыл облысының шекарасы) бойынша көлік қозғалысына уақытша шектеу қойылды.
Айта кетейік, түнгі уақытта Алматы облысында қалың қар жауа бастады. Синоптиктердің болжамынша, күндіз де қар жаууы жалғасады. Күндіз ауа температурасы -5…-7 градус, ал түнде -8…-10 градус аяз болады деп күтіледі.
Жауапты қызмет өкілдері жүргізушілерді алыс жолға шықпас бұрын ауа райы болжамын ескеруге және жол жағдайы туралы ресми ақпарат көздерін бақылап отыруға шақырды.
