Министрлік дерегінше, 2025 жылы жүйелі профилактикалық жұмыстардың нәтижесінде елдегі қылмыс деңгейі айтарлықтай азайған. Атап айтқанда, тіркелген құқық бұзушылықтар саны 6 мыңнан астам дерекке төмендеген.
Сонымен қатар кісі өлтіру, денсаулыққа ауыр зиян келтіру, қарақшылық және тонау секілді аса ауыр қылмыстар саны қысқарған.
Аса ауыр қылмыстардың ашылу көрсеткіші 98%-ға дейін жетті. Бұған қоса, бұрынғы жылдары ашылмай қалған 2,7 мыңнан астам қылмыс әшкереленген.
Жыл бойы іздеуде жүрген 1,6 мыңнан астам адам ұсталып, хабарсыз кеткен 20 мыңнан астам азамат отбасына қайтарылған.
Жәбірленушілердің шығыны өтелді
Полиция қызметі тек қылмыстарды ашумен шектелмей, жәбірленушілердің құқықтарын қалпына келтіруге де басымдық берген.
Өткен жылы жалпы сомасы шамамен 60 млрд теңгеге жуық шығын өтелді.
Көшелер мен қоғамдық орындардағы қауіпсіздік күшейтіліп, қару қолдану арқылы жасалатын қылмыстардың саны азайған.
Жол қауіпсіздігі
Жол-көлік оқиғаларының алдын алу бағытында да кешенді шаралар қабылданған. 2025 жылы мас күйінде көлік басқарған 23 мыңнан астам жүргізуші ұсталды. Министрлік бұл шаралар жолдағы қайғылы жағдайлардың азаюына ықпал еткенін атап өтті.
Ұйымдасқан қылмыс пен есірткіге қарсы күрес
2025 жылы трансұлттық және ұйымдасқан қылмысқа қарсы күрес күшейтілген.
Ұйымдасқан қылмыстық топтар: Қылмыстық топ құру және оған жетекшілік ету деректері бойынша 78 қылмыстық іс қозғалып, 299 көшбасшы мен қатысушы жауапқа тартылды.
Есірткі айналымы: Заңсыз айналымнан 31,7 тонна есірткі тәркіленді, бұл шамамен 12 млн дозаға тең.
Нарколабораториялар: Ел аумағында 109 нарколаборатория жойылды, оның 13-і синтетикалық есірткі өндірумен айналысқан.
2026 жылға жоспар
Алқа мәжілісінде Ішкі істер министрлігінің 2026 жылға арналған басым міндеттері де айқындалды. Алдағы кезеңде балалар мен жасөспірімдер арасындағы құқық бұзушылықтың алдын алу, сондай-ақ цифрлық технологияларды қолдану арқылы қоғамдық қауіпсіздікті күшейту жұмыстары жалғасады.
Министрлік өкілдерінің айтуынша, «Заң мен Тәртіп» қағидатын одан әрі нығайту азаматтардың қауіпсіздігін қамтамасыз етудің басты бағыты болып қала бермек.
