Қазіргі уақытта, облыс аумағында заманауи су үнемдеу технологиялары 28,9 мың гектар алқапқа енгізілген. Оның ішінде 14,3 мың гектарда тамшылатып суару, ал 14,6 мың гектарда жаңбырлатып суару жүйелері қолданысқа енді. Осылайша, су үнемдеу технологияларымен қамтылған егістік алқаптардың жалпы көлемі 66,6 мың гектарға жетіп отыр.
Алматы облысы Ауыл шаруашылығы басқармасының басшысы Ғалым Тоқпейісов аталған жұмыстардың өңір үшін стратегиялық маңызға ие екенін атап өтті:
«Су тапшылығы – соңғы жылдары ауыл шаруашылығына елеулі әсер еткен негізгі мәселелердің бірі болды. Су үнемдеу технологияларын кеңінен енгізу арқылы біз бұл проблеманы кезең-кезеңімен шештік деуге болады. Қазіргі таңда фермерлер суды 30–40 пайызға дейін үнемдеп, өнімділікті арттыруға қол жеткізіп отыр. Бұл – климаттың өзгеруі жағдайында өңірдің аграрлық тұрақтылығын қамтамасыз ететін маңызды қадам», – деді басқарма басшысы.
Сарапшылардың пікірінше, аталған шаралар тек су тапшылығын жоюмен шектелмей, ауыл шаруашылығы өнімдерінің көлемі мен сапасын арттыруға, сондай-ақ диқандардың шығынын азайтуға мүмкіндік беріп отыр. Осылайша, Алматы облысында су ресурстарын тиімді басқару арқылы агроөнеркәсіп кешенінің орнықты дамуына берік негіз қаланды.
