Полиция мәліметінше, із-түзсіз жоғалған ерлі-зайыптының мәйіттері табылған. Қазіргі уақытта тағы екі адамның жүрген жерін анықтау бойынша іздестіру шаралары жалғасып жатыр.
«Аталған дерек бойынша адам өлтіру белгілерімен қылмыстық іс қозғалды. Күдіктілердің жеке басы анықталды. Қазіргі уақытта оларды іздеу және ұстау мақсатында құқық қорғау органдары жедел-іздестіру іс-шараларын жүргізіп жатыр», – деп хабарлады Атырау облысы Полиция департаменті.
Ведомство өкілдерінің айтуынша, тергеу мүддесіне байланысты өзге ақпарат әзірге жарияланбайды.
Еске салайық, 25 желтоқсанда Атырау облысының полициясына қала тұрғынынан ағасы мен оның отбасы бір айдан астам уақыт бойы хабар-ошарсыз кеткені жөнінде арыз түскен.
Полиция мәліметінше, Қызылқоға ауданына қарасты Жангелдин ауылының тұрғындары қараша айында өз үйлерінен белгісіз бағытқа шығып кетіп, содан бері оралмаған.
Кейінірек әлеуметтік желілерде «Атырау облысында із-түзсіз кеткен отбасының тағы екі мүшесі жоғалғаны» туралы ақпарат тарады. Алайда Полиция департаментінің баспасөз қызметінің хабарлауынша, бұл мәлімет ресми түрде тіркелмеген. Қазіргі уақытта ақпарат тексеріліп жатыр, ал туыстары аталған дерек бойынша арыз түсірмеген.
