Бала футбол ойнап жүргенде қақпадан шығып тұрған темірге соғылған. Ақмола облысының көппрофильді ауруханасына баланы басына қадалған темір алмастан жеткізді. Дәрігерлер отаны сәтті аяқтап, науқасты аман алып қалды. Қазір баланы жансақтау бөлімінен хирургия палатасына ауыстырды.
«Анасының айтуынша, бала футбол алаңында доп қуып жүрген. Балалармен ойнап жүрген бала абайсызда темірге соқтығысып қалған. Темірдің белгілі бір бөлігін кесіп, оны бірден бізге алып келді. Пациент бізге келгенде есінен танбаған, ояу келді. Бұл жерде біздің дәрігерлер баланы КТ-дан өткізіп, керек тексерістің бәрін жасады. Ми, көз бәрі дін аман», — деді медициналық мекеменің басшысы Сабыржан Сабыралиев.
Дәрігерлердің айтуынша, ауруханада бұндай жағдай бұрын-соңды орын алмаған. Оның еш дене мүшесіне зақым келмегені таң қаларлық жағдай.
