Банк мәліметінше, Денсаулық сақтау министрлігі енгізген өзгерістерге сәйкес, 3 желтоқсанда жарияланған жаңа ереже бойынша зейнетақы қаражатын көз ауруларын емдеуге де, стоматологияға да пайдалану енді рұқсат етілмейді.
Отбасы банк 4 желтоқсаннан бастап офтальмологиялық қызметтерге жаңа өтінім қабылдамайтынын мәлімдеді. Алайда осы күнге дейін жіберілген барлық өтінім бұрынғы тәртіппен қаралады.
Қазіргі таңда банкте «офтальмология» бағыты бойынша жалпы сомасы 13,3 млрд теңгені құрайтын 15 808 өтінім бар. Оның ішінде:
– 5131 өтінім (4,6 млрд теңге) тексеріліп жатыр;
– 10 677 өтінім (8,7 млрд теңге) бойынша қосымша құжат сұратылған.
Стоматология бойынша өтінімдер тоқтатылған соң офтальмологияға сұраныс күрт артқан: 15 қыркүйекке дейін айына орта есеппен 174 өтінім мақұлданса, жаңа шектеулерден кейін бұл көрсеткіш 7 есе өсіп, 1 264 өтінімге жеткен.
Банк бірқатар күмәнді жағдайларды да анықтаған. Әртүрлі клиенттер бір ғана офтальмологиялық клиникамен келісім жасағанымен, құжаттарда клиника әртүрлі қалаларда орналасқан болып көрсетілген. Тексеру кезінде аталған мекенжайларда мұндай клиника жоқ екені анықталған.
Соған қарамастан, зейнетақы жинағының қолжетімді бөлігі бұрынғыдай бірқатар маңызды әрі қымбат ем түрлеріне пайдалануға рұқсат етіледі. Олар:
– орфандық (сирек) ауруларды емдеу;
– реконструктивтік және қалпына келтіру операциялары;
– радионуклидті және радио-йод терапия;
– радиохирургиялық ем;
– протондық терапия.
Жаңа шектеулер Денсаулық сақтау министрлігінің біржолғы зейнетақы төлемдерін мақсатты және тиімді қолдану талабына сәйкес енгізілген.
