Марапат иелерінің қатарында халықаралық және республикалық конкурстардың, фестивальдер мен көрмелердің лауреаттары, түрлі деңгейдегі спорт жарыстарының жеңімпаздары, сондай-ақ қоғамның дамуына үлес қосып жүрген азаматтар бар.
ҚР Мәдениет және ақпарат министрі Аида Балаева салтанатты жиында жастар саясатының маңызы артып келе жатқанын атап өтті. Министрдің айтуынша, Президент бастамаларының арқасында жоғары білімнің қолжетімділігі артып, жас ғалымдарға арналған гранттар саны көбейген. Сонымен қатар еңбек нарығында жас мамандардың мүмкіндіктерін кеңейтетін жаңа жобалар іске қосылуда.
Креативті индустрия, цифрлық экономика және кәсіпкерлікті дамытуға бағытталған бастамалар да мемлекет тарапынан қолдау тауып отыр.
«Мемлекет басшысы жастарға әрдайым үлкен сенім артып келеді. Әрбір Жолдауында, әр реформасында бұл сенім айқын көрініс табады. “Заң және тәртіп”, “Таза Қазақстан” бастамалары мен волонтерлік жобаларды жастардың белсенді қолдауы – жаңа идеологияның маңызды бөлігі. Ал осы идеологияны жүзеге асыратын да, оны алға жетелейтін де — өздеріңіз», – деді Аида Балаева.
Биылғы лауреаттар “Ғылым”, “Эстрада”, “Классикалық музыка”, “Халық шығармашылығы”, “Спорт”, “Дизайн және бейнелеу өнері”, “Журналистика”, “Қоғамдық қызмет”, “Театр және кино”, “Әдебиет” номинациялары бойынша анықталды.
2025 жылғы жеңімпаздардың қатарында белгілі әнші Еңлік Құрарбек (Yenlik), “Славян базары – 2024” халықаралық вокалдық байқауының бас жүлдегері Ерназар Жұбан, “Қайрат” футбол клубының шабуылшысы Дастан Сәтпаев бар.
