Мамандардың айтуынша, алдағы қыс бірқалыпты, кей өңірлерде қалыптыдан жылырақ болады.
Желтоқсан: елдің басым бөлігінде нормадан жылы болады
Желтоқсанда Қазақстанның көп аймағында ауа температурасы нормадан 1–2° жоғары болады деп күтіледі. Ал Түркістан, Жамбыл, Алматы, Жетісу облыстарында, сондай-ақ Қарағанды облысының оңтүстігінде, Абай облысында, Қызылорда облысының оңтүстік-шығысында және Ұлытау облысында температура климаттық нормаға сәйкес қалыптасады.
Жауын-шашын мөлшері елдің басым аумағында норма деңгейінде болады.
Кей өңірлерде — Қызылорда облысының көп бөлігінде, Ақтөбе облысының оңтүстік-шығысында, Қостанай облысының оңтүстік-батысында және Ұлытау облысының батысында — жауын-шашын нормадан аз түсуі мүмкін.
Қаңтар: кей өңірлерде сәл суық
Қаңтар айында орташа ауа температурасы еліміздің көп бөлігінде нормаға сай болады.
Сонымен қатар Абай, Шығыс Қазақстан, Жетісу облыстарында, Алматы облысының басым бөлігінде, Қарағанды облысының шығысында және Павлодар облысының оңтүстік-шығысында температура нормадан 1° төмен болуы мүмкін.
Жауын-шашын мөлшері республиканың басым бөлігінде қалыпты деңгейде сақталады.
Ал Түркістан облысының оңтүстік-шығысында, Жамбыл мен Алматы облыстарының оңтүстігінде, Шығыс Қазақстан облысының оңтүстік-шығысында және Жетісу облысында жауын-шашын нормадан көп түсуі ықтимал.
Ақпан: бүкіл ел бойынша жылырақ
Ақпан айында ауа температурасы Қазақстанның барлық өңірінде нормадан 1–2° жоғары болады деп болжануда.
Жауын-шашын мөлшері ай бойы елдің барлық аумағында климаттық норма деңгейінде сақталады.
