Эпидемиологиялық маусым басталған 1 қыркүйектен 29 қазанға дейін барлығы 1 128 140 ЖРВИ жағдайы тіркелген. Бұл көрсеткіш те өткен жылмен салыстырғанда 1,2 есе төмен. Ауру жұқтырғандардың 66%-ы – 14 жасқа дейінгі балалар (750 319 жағдай).
Министрлік мәліметінше, маусым басынан бері А типті тұмаудың (H3N2) 45 жағдайы расталған, оның 23-і – балалар арасында. Тұмауға жатпайтын вирустарға жүргізілген 1456 зертханалық талдаудың 30%-ынан оң нәтиже анықталған. Көбіне риновирус (60%), паратұмау (14,4%) және бокавирус (10,5%) тіркелуде.
Ел бойынша инфекциялық стационарларда 7 222 төсек-орын дайындалған, оның 39%-ы ғана толған. Қазіргі уақытта 2 793 пациент ауруханаға жатқызылған, оның 2 433-і ЖРВИ-мен, 360-ы пневмониямен ем қабылдауда. Министрлік инфекциялық бөлімшелерде артық жүктеме жоқ екенін, қажет болған жағдайда қосымша орындар барын мәлімдеді.
Тұмауға қарсы вакцинация жалғасуда. Осал топтарға арнап 2,1 млн доза вакцина сатып алынып, халықтың 11%-ын қамту жоспарланған (ДДҰ ең төменгі шекті – 10% деп ұсынады). 29 қазанға дейін 1 689 178 адамға екпе салынған.
Әлемдік жағдай
ДДҰ дерегінше, Еуропада тұмау белсенділігі артып келеді. Алты елде аурушаңдық базалық деңгейден асып, Испания мен Норвегияда індет тіркелген. 129 жағдайдың 98%-ы — А типті тұмау.
АҚШ-та вирус белсенділігі төмен: 38-аптада бар болғаны 27 жағдай тіркелді. Азия елдерінде (Катар, Сингапур) А(H1N1)pdm09, A(H3N2) және В типті тұмаудың ошақтары байқалуда.
