Алайда мұндай бағадағы қантты аталған дүкен сөрелерінен табу оңайға соқпайды. Нарықтағы қант тапшылығы салдарынан сауда нүктелері оны адам басына 1 келіден ғана үлестіруге мәжбүр. Қаладағы әлеуметтік маңызы бар өнімдер сатылатын дүкендердің бірі «Шойбек». Сауда орны күнделікті 50 кг қант сатып отыр.
«Басында бірден 50 кг қантты сөреге қоятынбыз. Адамдар 2-5 кг-нан алып кететін. Ал қазіргі күні мөлшермен, үш уақытқа бөліп сатып жүрміз және 1 адам тек 1 кг ғана ала алады. Мұндағы мақсатымыз барынша халықтың қолына аз мөлшерде болса да қантты жеткізу», — дейді дүкен сатушысы Динара Шойбекова.
Қазіргі уақытта «Жетісу» ӘКК мамандарының мәлімдеуінше, қорда 690 тонна қант бар. Мамандар бұл өңір бойынша қант қажеттілігін өтей алмайытынын әрі небары үш айға ғана жеткілікті екенін айтады. Қор мамандарының айтуынша, қант бағасының қымбаттауы Ресейден әкелінетін қант экспортына тыйым салынуына байланысты.
Айта кетейік, осы күні қаладағы қант бағасы аса қымбаттап кетті. Мәселен, жекеменшік дүкендерде 600-700 теңге, ал үлкен сауда желілерінде 435 теңге шамасында.
