Жер сілкінісінің эпицентрі Алматы қаласынан оңтүстік-батысқа қарай 465 шақырым қашықтықта, Қырғызстан аумағында орналасқан. Эпицентр координаттары – 42.270º солтүстік ендік пен 71.378º шығыс бойлық. Тереңдігі шамамен 10 шақырым, ал жер сілкінісінің магнитудасы MPV 5.9 деңгейінде болды.
Жер сілкінісі Жамбыл және Түркістан облыстарында, сондай-ақ Шымкент қаласында айқын сезілген. MSK-64 шкаласы бойынша дүмпудің күші төмендегідей бағаланды:
-
4 балл: Жамбыл облысы (Тараз, Жуалы, Байзақ, Жамбыл аудандары), Түркістан облысы (Түлкібас, Төлеби аудандары);
-
3 балл: Қаратау, Манкент, Ақсукент, Қазығұрт, Темірлан, Шымкент қаласы;
-
2 балл: Жаңатас, Сарыағаш, Келес, Шу, Түркістан, Кентау, Жетісай және Шардара қалалары.
ҚР ТЖМ мәліметінше, қираулар мен зардап шеккендер туралы ақпарат түскен жоқ. Министрліктің күштері мен құралдары жергілікті атқарушы органдармен бірлесе отырып, жағдайды бақылауда ұстап отыр.
Төтенше жағдайлар вице-министрі Батырбек Әбдішевтің төрағалығымен ТЖМ жедел штабының бейнеконференция форматында отырысы өтіп, өңірлердегі ахуал талқыланды.
– ТЖМ күштері кез келген жағдайға толық дайын. Барлық инфрақұрылым штаттық режимде жұмыс істеп тұр, – делінген министрлік хабарламасында.
«Қазселденқорғау» мекемесінің мамандары аймақтағы сейсмикалық белсенді аудандарға барып, топырақтың деформациясын, жарықтар мен шөгулерді тексерді. Елеулі зақымданулар мен қауіп белгілері анықталған жоқ.
Тіршілікті қамтамасыз ету объектілері мен стратегиялық нысандар қалыпты режимде жұмыс істеуде.
