Жамбыл ауданында заманауи технологиямен жабдықталған «BOSAGA Co» ЖШС кірпіш зауытының құрылысы басталды. Жобаның жалпы құны – 3,5 млрд теңге.
Кәсіпорын жылына 50 млн дана кірпіш шығаратын қуатқа ие болады. Қазіргі уақытта 50 адам тұрақты жұмыспен қамтылып, олардың орташа айлық еңбекақысы 300 мың теңгені құрап отыр.
Алматы облысының әкімі Марат Сұлтанғазиев зауыт құрылысының барысымен танысып, аталған нысанның өңір экономикасын дамытудағы маңыздылығын атап өтті.
«Бұл жоба – облыстың инвестициялық тартымдылығының нақты дәлелі. Өндірістік нысандардың көбеюі жаңа жұмыс орындарының ашылуына, халықтың табысын арттыруға ықпал етеді», – деді әкім.
Зауыт директоры Қуанбек Ұланбатыр да жобаның ерекшелігіне тоқталды.
«Біздің басты мақсатымыз – аймаққа сапалы құрылыс материалы қажет болғанда, импортқа тәуелділікті азайту. Жергілікті шикізат негізінде экологиялық таза өнім шығарып, нарыққа жеткізуді көздеп отырмыз», – деді ол.
Зауыт 2025 жылдың соңына дейін толық іске қосылады деп жоспарланып отыр.
