Бұл бастама ұстаз мәртебесін көтеруге, мұғалім мамандығын кеңінен насихаттауға және оның қоғамдағы ерекше рөлін айшықтауға бағытталған.
Ұстаздық – тек мамандық емес, үлкен миссия. Педагогтер өскелең ұрпақты тәрбиелеп, ұлттың зияткерлік әлеуетін қалыптастырады, әр баланың өз жолын табуына бағыт береді. Бүгінде еліміздегі 22 мыңнан астам білім беру ұйымында 6 миллионға жуық оқушыға 600 мыңнан аса педагог сапалы білім беруде.
Челлендждің мақсаты
Оқу-ағарту министрлігі онкүндік аясында «Ұстазыңды құттықта!» челленджін жариялады.
Шараның басты мақсаты – әр балаға білім мен тәрбие берген, оның тұлға болып қалыптасуына үлес қосқан ұстазға алғыс білдіру және құрмет көрсету.
Челленджге кез келген азамат қатыса алады. Ол үшін:
-
әлеуметтік желілерде #Ұстазыңдықұттықта және #ПоздравьУчителя хэштегтерімен құттықтау жариялау;
-
өз ұстазыңызға қоңырау шалып, жылы лебіз білдіру;
-
құттықтау хатын немесе естеліктеріңізбен бөлісу жеткілікті.
Ұстаздар күні – 5 қазан
Айта кетейік, 2023 жылдан бастап Қазақстанда Ұстаздар күні ресми түрде 5 қазанда атап өтіледі. Бұл күні еліміздің түкпір-түкпірінде ұстаз еңбегін ұлықтауға арналған түрлі мерекелік іс-шаралар ұйымдастырылып, білім беру саласына қосқан үлесі үшін педагогтер марапатталады.
«Ұстазыңды құттықта!» челленджі – ұстаздар еңбегіне құрмет білдірудің және оларды қолдаудың жарқын үлгісі болмақ.
