«Президент Жарлығымен Цифрлық даму, инновациялар және аэроғарыш өнеркәсібі министрлігі енді Жасанды интеллект және цифрлық даму министрлігі болып аталады», — делінген хабарламада.
Жарлыққа сәйкес, инновациялық қызмет саласындағы функциялар мен өкілеттіктер енді Ғылым және жоғары білім министрлігіне беріледі. Осылайша жаңа министрлік жасанды интеллектті дамыту мен цифрлық трансформация үдерістеріне басымдық бермек.
Сонымен қатар Жасанды интеллект және цифрлық даму министрлігі мен Ғылым және жоғары білім министрлігі өздеріне берілген функциялар мен өкілеттіктер аясында бұрынғы Цифрлық даму, инновациялар және аэроғарыш өнеркәсібі министрлігінің құқықтық мирасқоры болып саналады.
Президенттің бұл Жарлығы қол қойылған күннен бастап күшіне енеді.
Бұл өзгеріс елімізде жасанды интеллект пен цифрлық технологияларды дамытуға жаңа серпін бермек.
