Алматы облысында жасыл-желек қорын көбейтуге ерекше мән берілуде. Бұл бағыттағы жұмыстардың бірі – орман шаруашылығы тәлімбақтарын дамыту. Облыс әкімі Марат Сұлтанғазиев Жалағаш орман шаруашылығы тәлімбағына барып, мұндағы ағаш көшеттерінің өсірілу барысымен танысты, деп хабарлайды Alataunews.kz.
Тәлімбақта Шренк шыршасы, арша (туйя), Қырым қарағайы мен қарағайдың көшеттері өсірілуде. Мамандар әкімге екі, үш және төрт жылдық Шренк шыршасының күтімі мен ерекшеліктерін таныстырды.
«Мына тәлімбаққа біз жылда Шренк шыршасын егеміз. Ол үшін алдымен бір жыл бұрын шыршаның бүрлерін теріп алып, кептіреміз. Одан кейін тұқымын жинап, зертханада сапасын тексереміз. Қыста 45 күнге қарға көміп, кейін кептіріп, марганцовкамен жуамыз. Содан соң арнайы қарықтарға егеміз. Күннен қорғау үшін осындай қалқандар орнатылады», – деді облыстық табиғи ресурстар және табиғатты пайдалануды реттеу басқармасының басшысы Қанат Нүсіпбаев.
Жас көшеттің күтімі де ерекше. Уақтылы суару, құстың шабуылынан қорғау, арам шөптен тазарту – бәрі де егілген талдың тамыр жаюына ықпал етеді.
«Шырша көшеті кішкентай бала секілді, алғашқы жылдары әр талды ерекше күтіп-баптау қажет», – дейді шаруалар.
Жалағаш тұқымбағының жалпы аумағы – 54 гектар. Биыл мұнда 0,5 гектарға 400 мың түп көшет отырғызылған. Қазіргі таңда 2,6 гектар аумақта 2 млн 216 мың түп Шренк шыршасы өсірілуде.
Алматы облысында барлығы 12 тәлімбақ жұмыс істейді. Оның екеуі тұрақты, 10-ы уақытша. Бұл жерлерде өсірілген жас көшеттер облысты ғана емес, көршілес аймақтарды да жасыл желекпен қамтуға мүмкіндік беріп отыр.
Жалағаш тәлімбағы – өңірдің жасыл қорын молайтудағы маңызды орындардың бірі. Мамандардың айтуынша, мұндағы әрбір егілген көшет болашақта орман алқабын ұлғайтып қана қоймай, Алматы облысының экологиялық тепе-теңдігін сақтауға зор үлес қосады.
