Жұмысшылар құрылысты қар түспей тұрып аяқтауға қамданып жатыр, деп хабарлайды Alataunews.kz.
Алматы облысындағы облыстық маңызға ие жолдың орташа жөндеу жұмыстары 2024 жылдың мамырында басталып, жоспар бойынша 2025 жылдың желтоқсан айында аяқталуы тиіс. Бірақ құрылыс фирмасының айтуынша, жұмыстар одан ерте аяқталмақ.
«Біз «Нарынқол – Сүмбе» тасжолына орташа жөндеу жүргізіп жатырмыз. Жөндеуден өтуі тиіс жолдың жалпы ұзындығы – 38 км жол. Қазіргі уақытта, 11 шақырымын жасау қалды. Қалыңдығы – 6 см. Осы айда бітіреміз. 18 жұмысшы және грейдер, самосвал және ескі асфальтты қырып жаңасын төсеуге арналған 8 техника жұмыс істеп жатыр», — деп атап өтті L-VESA құрылыс фирмасы директорының орынбасары Алексей Фомин.
Айта кетейік, жоба құны – 1,9 млрд теңге. Жөндеу жұмыстарын техникалық қадағалауға «КазАрт-Құрылысы» ЖШС жауапты.
