Комиссия құрамына қоғам өкілдері, креативті индустрия мамандары, сондай-ақ атом энергетикасы, филология және тарих салаларының сарапшылары енді. Сонымен қатар өтінімдерді қабылдау және қарау тәртібін, оларды бағалау өлшемшарттарын және қорытынды шешім қабылдау рәсімдерін айқындайтын конкурстың өткізу ережесінің жобасы қаралды.
Жұмыс тобының мәліметінше, АЭС атауын айқындау барысында бірқатар фактор ескеріледі.
«Конкурстық комиссия ұсыныстарды атаудың танымалдылығы, тарихи және мәдени маңыздылығы, атом энергетикасының имиджіне сәйкестігі, әуезділігі, есте сақтауға жеңілдігі, бірегейлігі және өзіндік ерекшелігі секілді өлшемшарттар бойынша бағалайды. Сонымен қатар қорлайтын немесе кемсітушілік сипаттағы сөздерді, бейәдеп лексиканы, коммерциялық брендтерді қамтитын, сондай-ақ Қазақстан заңнамасын және үшінші тұлғалардың, соның ішінде авторлық құқықты бұзатын атаулар қабылданбайды», – делінген ведомство хабарламасында.
Агенттік мәліметінше, азаматтардың кеңінен қатысуын қамтамасыз ету үшін цифрлық шешімдер қолданылмақ. Осыған орай, Цифрлық даму, инновациялар және аэроғарыш өнеркәсібі министрлігі «Ұлттық ақпараттық технологиялар» АҚ-мен бірлесіп, өтінімдерді eGov Mobile қосымшасы арқылы қабылдау жөнінде ұсыныс енгізген.
