«Алматы және Жетісу облысы болып екіге бөлінгелі бері (20.06.22 ж-15.08.22 ж) пайдаға аспай жатқан 28,57 мың га жайылым жер мемлекетке қайтарылды. Сондай-ақ елді мекендерден 5 км радиуста жатқан 78,2 мың га жайылым жер әкімдік иелегіне қайтарылады», — дейді басқарма басшысы.
Әкімдікке қайтарылған жеке меншік жер үшін мемлекет өтемақы төлейді. Ал бұл өтемақының сомасын тәуелсіз бағалаушы компания есептейді.
«Қазіргі таңда мемлекетке қайтарылған жерлерді әкімдік атына тіркеу жүріп жатыр. Нәтижесінде 22,17 мың га жерге жұрт мал жаятын болады, қалған 6,4 мың га жер конкурс арқылы жеке және заңды тұлғаға беріледі. Олар бұл жерде ауыл және мал шаруашылығымен айналысады», — деді Сәбит Сәдуақасов өз сөзінде.
Басқарма басшысының айтуынша, ҚР Ауыл шаруашылығы министрлігінің №139 бұйрығы бойынша әлі де тексерістен өтетін 213,9 мың га жер бар. Тексеріс аяқталған соң қолданылмай, бос жатқан жерлерге салықты 20 есе көбейту үшін материалдар жергілікті Мемлекеттік кірістер департаментіне жолданады.
Айта кетейік, Алматы облысының жер фонды 10,5 млн га құрайды. Оның 4,2 га ауыл шаруашылығына арналған болса, бұдан бөлек, қорда 2,5 млн га жер бар.
