Саудаға элиталы пәтерлер, қымбат көліктер және брендтік әшекей бұйымдар шығарылмақ. Түскен қаржы жәбірленушілердің шығынын өтеуге жұмсалады.
Сот процесі барысында 47 адам жәбірленуші деп танылған еді.
Еске салайық, 2024 жылғы 25 шілдеде аталған қордың бұрынғы жетекшісі Перизат Қайрат 10 жылға, ал оның анасы 7 жылға бас бостандығынан айырылған болатын. Тергеу материалдарына сәйкес, олар қайырымдылыққа жиналған қаражатты өз қажеттіліктеріне жұмсаған. Келтірілген залал көлемі 3,5 миллиард теңгеден асты.
Алайда сот отырыстары кезінде Перизат Қайрат атаған өзге тұлғаларға қатысты іс қозғалған жоқ. ҚР Қаржылық мониторинг агенттігі төрағасының орынбасары Жеңіс Елемесов бұл жөнінде:
– Тергеу барысында қор қаржысын жымқырған басқа адамдар анықталған жоқ. Сот үкіміне сәйкес, сот орындаушылары оның мүлкін аукционға шығарып, сатудан түскен қаражат есебінен жәбірленушілердің шығыны өтеледі, – деді.
Бұл шешім әділеттілікті қамтамасыз етіп, зардап шеккен азаматтардың құқықтарын қорғауға бағытталған маңызды қадам болып отыр.
