Ішкі істер министрі Ержан Сәденовтің айтуынша, келісім көші-қон бақылауын күшейтуді көздейді. Бұған сәйкес, енді екі елдің азаматтары басқа мемлекетте 30 күннен артық болған жағдайда полицияда тіркелуге міндетті болады. Бұған дейін мұндай талап 90 күннен кейін ғана қолданылатын. Сонымен қатар, ұлттық заңнамаларға сәйкес, 90 күннен астам уақыт елде болу мерзімін ұзарту үшін уақытша тұруға рұқсат алу мүмкіндігі қарастырылған.
«Осылайша, тараптар арасындағы визалық режим алынып тасталады. Бұл азаматтардың сапар шығындарын азайтып, өзара қатынасты жеңілдетеді», – деді Ержан Сәденов Мәжілістің жалпы отырысында.
Келісімнің тағы бір жаңалығы – елге кіру үшін қолданылатын құжаттар тізімінің кеңеюі. Армения азаматтары Қазақстанға сәйкестендіру картасымен кіре алады. Ал қазақстандықтар үшін жеке куәлік жеткілікті. Бұл бұрын тек Ресей мен Қырғызстанға барғанда ғана қолданылатын мүмкіндік еді.
ІІМ басшысының дерегінше, биылғы жылдың басынан бері Қазақстанға Армениядан 12 мыңға жуық азамат келген. Айта кетейік, Армения тарапы келісімді былтырғы қарашада ратификациялаған болатын.
Жаңа ереже екі ел арасындағы ынтымақтастықты нығайтып, азаматтардың еркін қатынасына жол ашады деп күтілуде.
