Жаңа оқу жылының басты ерекшелігі – облыста 9 жаңа мектептің пайдалануға берілуі. Соның сегізі ұлттық «Келешек мектеп» жобасы аясында салынса, біреуі жеке инвестордың қаражаты есебінен бой көтерді. Заманауи талаптарға сай жабдықталған бұл білім ордалары оқушыларға жайлы әрі қолайлы орта қалыптастырады.
Білім сапасын арттыру мақсатында биыл оқулықтар қоры толық жаңартылды. Жаңа оқу жылына орай облыстың барлық мектептері қажетті құралдармен 100 пайыз қамтамасыз етілді. Бұл мақсатқа 3 млрд теңге бөлініп, 808 568 жаңа және қайта басылған кітап сатып алынды.
Алғаш рет 4-сынып оқушыларына қазақ тілінде оқытатын мектептер үшін орыс тілі, сондай-ақ ағылшын, неміс, француз тілдері, еңбекке баулу, бейнелеу өнері, цифрлық сауаттылық және жаратылыстану пәндерінен жаңа оқулықтар енгізілді. Ал орта және жоғары сыныптарға арналған қазақ және орыс тілі мен әдебиеті, математика, физика, химия, биология, Қазақстан тарихы, ағылшын тілі мен көркем еңбек пәндерінің жаңартылған басылымдары жеткізілді.
Сонымен қатар «Қазақстан географиясы» (7–8 сынып), «Қазақстан тарихы» (8 сынып), «Бастапқы әскери және технологиялық дайындық» (10–11 сынып) және «Құқық негіздері» (11 сынып) оқулықтары қайта басылып, оқушыларға ұсынылды.
Жаңа оқу жылының басталуы білім саласын дамытуға жасалған зор қадам ретінде бағалануда.
