Шараның мақсаты – медицина саласындағы өзекті мәселелерді талқылап, денсаулық сақтау жүйесі мен медиа қауымдастығы арасындағы диалогты нығайту.
Жиын барысында облыстағы медициналық ұйымдардың қызметінде медициналық көмектің сапасы, медициналық этиканы сақтау, сондай-ақ ұйымдастырушылық-басқарушылық мәселелерге қатысты өзекті тақырыптар талқыланды.
«Мемлекет басшысының бұқаралық ақпарат құралдары өкілдерімен және халықпен ашық сөйлесіп, барлық ақпаратты ашық беру керек деген тапсырмасы бойынша және «Халық үніне құлақ асатын мемлекет» концепциясына сәйкес, Алматы облысы тұрғындарына медицина саласында болып жатқан жаңалықтармен бөлісу мақсатында осындай шара өткізіп отырмыз. Кездесуге БАҚ өкілдері, блогерлер, қоғамдық кеңес мүшелері шақырылды. Олардың тарапынан қойылған сұрақтарға нақты жауаптар беріліп, сараптама жасадық, талқылау жүргіздік. Сонымен қатар, алға қойылған мақсаттар мен жобалар және оларға жету жолдары жайлы әңгіме тарқаттық. Бұған дейінгі болған кездесулерде көтерілген сұрақтардың бірнешеуі бүгінгі күні шешімін тауып келе жатыр», — деп атап өтті Алматы облысының Денсаулық сақтау басқармасының басшысы Ержан Сүлейменов.
Бұл кездесу медицина саласындағы өзекті мәселелерді ашық талқылауға, қоғаммен тиімді байланыс орнатуға және алдағы жұмыстардың бағытын айқындауға мүмкіндік берді. Ашық диалог форматы дәрігерлер, билік және медиа арасындағы сенімді арттырып, халықтың денсаулық сақтау жүйесіне деген сенімін нығайтуға жол ашады.
Айта кетейік, мұндай жиындар әр тоқсан сайын өтетін болады.
