Мемлекеттік қызметшілер қоғам алдында мемлекеттің тұлғасы болғандықтан, Әдеп кодексі ең алдымен қоғамның мемлекеттік органдарға сенімін нығайтуға бағытталған. Бұл құжатта мемлекеттік қызметшілердің мінез-құлқының жалпы стандарттары, қызметтен тыс уақыттағы жүріс-тұрыс ережелері, қызметтік қарым-қатынастардағы тәртіп нормалары, сондай-ақ көпшілік алдында, оның ішінде бұқаралық ақпарат құралдарында сөз сөйлеу талаптары нақты белгіленген.
Қоғамдық пікірдің басты көрсеткіштерінің бірі – мемлекеттік қызметшілердің қызметтен тыс уақытта, соның ішінде қоғамдық орындарда өзін қалай ұстайтыны екені құпия емес. Осыған байланысты, қызметтік әдеп қағидаларына сәйкес мемлекеттік қызметшілер қызметтен тыс уақытта да жалпы қабылданған моральдық-әдептілік нормаларын сақтауы тиіс. Олар қоғамға жат мінез-құлықтан, соның ішінде адамның қадір-қасиеті мен қоғамдық адамгершілікке нұқсан келтіретін масаң күйде болудан аулақ болуы қажет. Сонымен бірге қарапайымдылық танытып, көрсетілетін қызметтерді алу кезінде өзінің лауазымдық жағдайын баса көрсетпеуі және пайдаланбауы шарт. Сондай-ақ қоғамдағы тәртіп пен қауіпсіздікке зиян келтіретін заң бұзушылыққа жол бермеуі, басқа азаматтарды құқыққа қарсы әрекеттерге тартпауға міндетті.
Әдеп кодексі жалпы қабылданған мінез-құлық нормаларының басқа да қырларын қамтиды. Атап айтқанда, мемлекеттік қызметшілер іскерлік әдепті сақтап, ресми мінез-құлық қағидаларын ұстануға міндетті.
Мемлекеттік қызметшілердің сырт келбеті де олардың кәсіби міндеттерін орындау барысында мемлекеттік аппараттың беделін арттыруға ықпал етуі тиіс. Сыртқы бейнесі іскерлікпен, ұстамдылықпен және ұқыптылықпен ерекшеленіп, жалпыға ортақ іскерлік талаптарға сай болуы қажет.
Осылайша, мемлекеттік қызмет атқару – қоғам мен мемлекет тарапынан көрсетілген ерекше сенім. Бұл сенім мемлекеттік қызметшілердің моральдық-әдептілік бейнесіне жоғары талаптар қойып, олардың әрбір іс-әрекетін халыққа үлгі ету міндетін жүктейді.
Қазақстан Республикасы
Мемлекеттік қызмет істері агенттігінің
Алматы облысы бойынша департаментінің
басшысы Нұрсұлтан Сейдалиев
