Төтенше жағдайлар министрлігінің мәліметінше, өрт құрғақ шөп пен бұталардың тұтануынан басталған.
Тілсіз жаумен күреске Алматы облысы мен Алматы қаласының төтенше жағдайлар департаменті, Іле-Алатау мемлекеттік ұлттық паркі, жергілікті атқарушы органдар және ТЖМ-нің 28237 әскери бөлімінің өкілдері жұмылдырылды. Жалпы саны 100-ден аса адам мен 20 техника бірлігі өртті сөндіру жұмысына қатысты.
Сонымен қатар, «Қазавиақұтқару» АҚ-ның тікұшағы арнайы су шашатын құрылғы арқылы аумаққа 8 рет су төгіп, барлығы 24 тонна су жұмсаған.
Рельефтің күрделілігі, биік шөп пен қалың бұтаның болуы, сондай-ақ өрт аймағына апаратын жолдың жоқтығы сөндіру жұмыстарына кедергі келтіргенімен, мамандардың үйлесімді әрекетінің арқасында өрт толықтай ауыздықталды.
Жалпы өрт аумағы 40 гектарды қамтыған. Қуанышқа орай, зардап шеккендер жоқ. Төтенше жағдайлар министрлігі тұрғындарды өрт қауіпсіздігі талаптарын сақтауға шақырады.
