Ведомствоның ресми түсіндірмесі 2025 жылғы 28 шілдеде Instagram парақшасында жарияланған:
«Қазақстан Республикасының Туризм және спорт министрлігі бірқатар бұқаралық ақпарат құралдарында тараған «балаларға спортпен айналысуға тыйым салынды» деген ақпаратқа байланысты түсінік беруді қажет деп санайды. 2025 жылғы 16 шілдеде бекітілген №133 бұйрықтың бұқаралық ақпарат құралдарындағы интерпретациясы шындыққа жанаспайды», — делінген хабарламада.
Министрліктің мәліметінше, бүгінде Қазақстанда 4 пен 17 жас аралығындағы 5,1 миллионнан астам бала мен жасөспірім тұрақты түрде спортпен айналысады.
«Сайыстар – спорттық дайындықтың бір бөлігі ретінде – белгілі бір физикалық әрі эмоционалдық жүктемелермен қатар жүреді. Осыған байланысты министрлік спорттық жарыстарға қатысу үшін ең төменгі жас шегін белгілеген»,- деп түсіндірді Туризм және спорт министрлігі баспасөз қызметі.
