«Үш Олимпиаданың әрқайсысының орны бөлек. Бірақ Париж Олимпиадасының алтыны мен үшін әрқашан биік тұрады. Бұл — маңдай тер мен талпыныстың, жеңіс пен жеңілістің, еңбек пен төзімнің жемісі. Бұл күн — менің бүкіл марапаттарымның шыңы», — деп жазды спортшы.
Сметов Олимпиадаға апарар жолда көптеген қиындықты еңсеруге тура келгенін жасырмады. Ол жетістікке жету үшін көп нәрседен бас тартып, үлкен тәуекелге барғанын атап өтті.
«Дәл осындай қуанышты, дәл осындай арманды барлық спортшының сезінгенін қалаймын. Олимпиада алтынын алғаннан кейін ғана мен өз өмірімді отбасыма, жақындарыма арнауға мүмкіндік алдым. Париждегі жеңісім біз алмайтын қамал жоқ екенін дәлелдеді. Енді сол жеңісімді 2028 жылы Лос-Анджелесте қайталағым келеді. Келесі Олимпиадада дәл осындай қуанышты сәтті өзім де, жанкүйерлерім де тағы бір мәрте сезінсін деп бар күшімді саламынй, – деді Елдос Сметов.
Айта кетейік, Елдос Сметов – Қазақстан дзюдосының символына айналған, бірнеше әлем чемпионатының жүлдегері, Олимпиада ойындарының алтын, күміс және қола медаль иегері. Оның Лос-Анджелеске баратын ниеті – еліміздің спорт тарихында жаңа парақ ашуға жасалған маңызды қадам.
