Министрдің айтуынша, мектептегі тамақ сапасына қатысты мәселе бірнеше жылдан бері көтеріліп келеді. Мемлекет басшысы бастауыш сынып оқушыларын сапалы тамақпен толық қамтуды тапсырған болатын. Ал 2023 жылы Президент мектеп асханаларындағы тағам сапасына ерекше назар аударып, Премьер-министрге қолданыстағы стандарттарды қайта қарау жөнінде нақты тапсырма берген еді.
«Осы тапсырма аясында Денсаулық сақтау министрлігі Оқу-ағарту министрлігімен бірлесіп жаңа ережелер бекітті. Ең алдымен, дайын тағамдардағы қант мөлшері 3,5 есеге, ал тұз мөлшері 2–2,5 есеге азайтылады. Өйткені баланың тамақтану дағдысы дәл осы жаста қалыптасады. Жаңа стандарттар тек мектеп асханаларына ғана емес, сонымен қатар балабақшалар мен мектепке дейінгі мекемелерге де қатысты», – деді Ақмарал Әлназарова.
Министрдің айтуынша, қазіргі уақытта мектептегі тамақ сапасын бақылау үшін медицина қызметкерлерін – атап айтқанда, мектеп медбикелерін арнайы оқыту жұмыстары жүргізіліп жатыр. Бұл — стандарттардың іс жүзінде орындалуын қамтамасыз етудегі маңызды қадамдардың бірі.
Жаңа ережелерге сәйкес, мектеп асханаларында қандай өнімдерді сатуға болатыны нақты белгіленген.
«Фастфуд, гамбургер, чебурек сияқты тез дайындалатын, бірақ ағзаға зиянды тағамдарға тыйым салынады. Сонымен қатар, газдалған сусындар мен шоколад өнімдері де буфет ассортиментінен алынып тасталды. Мәселен, 100 мл компотқа қанша қант қосу керектігіне дейін нақты көрсетілген. Біз бұл талаптарды 2014 жылдан бері қолданыста болған ережелерді қайта қарап, Дүниежүзілік денсаулық сақтау ұйымының халықаралық стандарттарына сәйкестендірдік», – деді министр.
Министрлік өкілі атап өткендей, бұл стандарттардың орындалуын бақылау әрі мониторинг жүргізу жұмысы жүйелі түрде жолға қойылады.
Жаңа талаптар 2025 жылдың 1 қыркүйегінен бастап күшіне енеді. Жоба оқушылардың денсаулығын сақтауға, семіздік пен созылмалы аурулардың алдын алуға бағытталған маңызды бастама ретінде бағаланып отыр.
