Автожолдардың құрылысы мен жөндеуін қадағалайтын ұйымдар енді жол құрылысы саласындағы кәсіби мамандарды штатқа алуға міндетті. Бұрын бұл талап аккредитация алу кезінде міндетті емес еді. Жаңа ереже жол сапасын бақылау жүйесін жақсартуға, сондай-ақ жөндеу жұмыстарының қолданыстағы стандарттар мен нормативтерге сай орындалуын қамтамасыз етуге бағытталған.
Сонымен қатар, қадағалау жүргізетін мамандардың құқықтық жауапкершілігі де күшейтілді. «Сыбайлас жемқорлыққа қарсы іс-қимыл туралы» Заңға енгізілген өзгерістерге сәйкес, техникалық және авторлық қадағалау қызметін атқаратын тұлғалар мемлекеттік функцияларды орындауға уәкілетті адамдарға теңестірілді.
Бұл түзету олардың өз міндеттерін тиісінше орындамаған жағдайда қылмыстық жауапкершілікке тартылатынын білдіреді.
Қабылданған шаралар еліміздегі автожол инфрақұрылымының сапасын арттыруға, сыбайлас жемқорлықты азайтуға және жол құрылысы саласындағы ашықтық пен тиімділікті қамтамасыз етуге бағытталған.
Бұл реформалар жол сапасына жиі шағым айтатын азаматтардың үмітін ақтап, еліміздегі көлік инфрақұрылымын жаңа деңгейге көтеруге септігін тигізбек.
