Ол бұл істі жай ғана алаяқтық емес, «аманатқа, адалдық пен қайырымдылыққа жасалған қиянат» деп сипаттады.
«Бүгін біз қоғам белсендісі ретінде танылған Қайрат Перизат пен оның анасы Алашбаева Ғайниге қатысты қылмыстық істің сот талқылауын қорытындылап отырмыз. Осы отырысқа дайындалып жатып, өз сөзімді “Ізгіліктің бетпердесі” деп атау ойы келді. Сөзімді қазақ халқына – жомарт әрі арлы халыққа алғыс айтудан бастағым келеді…» – деді прокурор.
Оразалинаның айтуынша, Перизат Қайрат қайырымдылық пен қоғамдық белсенділікті желеу етіп, жұрт сенімінен пайда табуға тырысқан. Ол өз мүддесін ізгілікпен бүркемелеп, халықтың шынайы ниетін жеке мақсатқа пайдаланғанын атап өтті.
Сөздің соңы – қатаң мәлімдеме
Мемлекеттік айыптаушы соттағы сөзін мынадай тұжырыммен аяқтады:
«Садақа – мансапқа жетудің құралы емес. Халықтың сенімі – ақша да, бренд те емес. Бұл – аманат. Ал аманатқа опасыздық жасағандар әшкере болады».
Айта кетейік, Перизат Қайрат соңғы жылдары қоғамда қайырымдылық бастамаларымен танылған. Алайда қазіргі сот процесі бұл әрекеттердің артында өзге ниет болуы мүмкін екенін көрсетіп отыр.
Сот үкімі алдағы күндері жариялануы мүмкін.
