Министр келтірген мәліметке сәйкес, 2025 жылғы 1 шілдедегі жағдай бойынша мемлекеттік қарыз көлемі 31,9 трлн теңгені құрады. Бұл көрсеткіш жалпы ішкі өнімнің (ЖІӨ) 21,1%-ына тең. Жыл басынан бері қарыз шамамен 40 млрд теңгеге ұлғайған.
Министрлік өкілдерінің айтуынша, мемлекеттік борыштың ұлғаюына республикалық бюджет тапшылығын жабуға бағытталған қарыз тарту және бұған дейін алынған сыртқы қарыздарды игеру себеп болған.
Соған қарамастан, жалпы ішкі өнімнің өсу қарқынының арқасында мемлекеттік борыштың ЖІӨ-ге қатысты үлесі төмендеуде. Мәселен, 2020 жылы бұл көрсеткіш 29,2% болса, 2024 жылы 23,5%-ға дейін азайған.
«Осылайша, 2030 жылға дейінгі Қазақстан Республикасының мемлекеттік қаржысын басқару тұжырымдамасында көзделген ЖІӨ-ге шаққандағы 32% лимит сақталып отыр», – деді Мәди Тәкиев.
Сондай-ақ министрлік 2024 жылғы 24 маусымда 2,5 млрд АҚШ доллары көлемінде евробондтар орналастырғанын мәлімдеді. Бұл қадам 2015 жылғы сыртқы міндеттемелер бойынша алдағы төлемдерді толықтай қайта қаржыландыруға мүмкіндік берген. Ең бастысы, бұл операция жиынтық борышты ұлғайтпай жүзеге асырылған.
Үкімет мәлімдемесінде сыртқы нарықтағы бұл мәміле квазимемлекеттік сектор ұйымдары үшін болашақта қарыз алуға қатысты кірістілік бағдарының айқындалуына жол ашты деп атап өтілді.
