Судьяның айтуынша, сот процесі ашық форматта өтуде және бұқаралық ақпарат құралдары өкілдерінің қатысуына шектеу қойылмаған. Қазірдің өзінде 70-тен астам БАҚ өкілі сот отырысына қатысуға ниет білдірген.
«Басты сот отырысы бейнебайланыс арқылы өтуі мүмкін. Бұл туралы шешімді төрағалық етуші судья қабылдайды. Ал сот отырысы сотталушылар Қайрат пен Алашпаеваға қатысты қылмыстық іс бойынша ашық түрде өтіп жатыр», – деді Сабыржан Кәрімов.
Алайда судья кейбір сот сәттерінде – сотталушылардан жауап алынатын кезде, түсініктеме берілген сәттерде және дәлелдемелерді зерттеу барысында – құпия ақпараттардың болуы мүмкін екенін ескере отырып, жариялылықты шектеу туралы шешім қабылдағанын еске салды.
«Қылмыстық іс жүргізу кодексінің 366-бабы 3-бөлігіне сәйкес, сотталушылар сот отырысының кез келген сәтінде айғақ беру құқығына ие. Осыған байланысты, сот процесіне қатысушылар болып табылмайтын тұлғалар мен БАҚ өкілдері залдан шығып, кейін қайта кіруі қажет болады. Бұл әр жолы үзіліс жариялауды талап етеді, уақыт алады және сот барысына кедергі келтіреді», – деді ол.
Осыған байланысты сот БАҚ өкілдеріне сот процесін ғимараттағы арнайы ұйымдастырылған баспасөз орталығынан бақылауды ұсынды.
Сонымен қатар, сот залында Перизат Қайрат, оның анасы және адвокатты суретке түсіруге, бейнежазба жасауға немесе тікелей эфир жүргізуге тыйым салынды.
