2025 жылғы байқау қорытындысы бойынша Жетісу облыстық филармониясының әртісі Алмагүл Батталиева Гран-при иегері атанып, жалпы 137 ұпай жинады. Финалдық кезеңде ол «Вечность» әнін шебер орындап, көрермен мен қазылар алқасының ыстық ықыласына бөленді.
Байқау барысында отандасымыз вокалдық жағынан күрделі, әлемдік және ресейлік хит әндерді шеберлікпен орындап, ерекше дауыс мүмкіндігі мен сахнадағы харизмасын көрсетті. Қазылар алқасы әншінің кәсіби деңгейін жоғары бағалап, басты марапатты ұсынды.
Бірінші орын Беларусь өкілі Валерия Бернатовичке бұйырды. Екінші орынды Армениядан Давид Киракосян мен Италиядан Доменико Барбера бөлісті. Ал үшінші орын Ресейден келген Эрик Ахметов пен Қырғызстан атынан қатысқан Рыскелді Старбековке табысталды.
Айта кетейік, «Славян базары» – ТМД елдері арасындағы беделді музыкалық байқаулардың бірі. Жыл сайын түрлі елдің талантты өнерпаздары бұл сахнада өз елінің намысын қорғап, жоғары деңгейде өнер көрсетуге тырысады. Алмагүл Батталиеваның жеңісі – қазақстандық эстраданың халықаралық деңгейде мойындалғанының айқын дәлелі.
