Сәуір айында бұл көрсеткіш 10,7% болған еді. Ұлттық банк таратқан мәліметке сәйкес, мамыр айында 16 өңірде инфляция үдеген, үш өңірде бәсеңдеген, ал бір өңірде өзгеріссіз қалған. Ең жоғары жылдық инфляция Алматы қаласында тіркелді – 13,0%.
Мамырда азық-түлік бағасы жылдық мәнде 9,6%-ға дейін жеделдеді (сәуірде – 8,5%). Бұл көрсеткіш бойынша ең жоғары өсім Ақмола облысында байқалды – 11,4%, ал ең төменгі өсім Алматы қаласында – 8,0%.
Азық-түлікке жатпайтын тауарлар бағасы да жылдық мәнде 9,0%-ға өсті (сәуірде – 8,9%). Түркістан облысында бұл көрсеткіш 14,2%-ға жетсе, Павлодар облысында 5,4%-бен шектелді.
Ақылы қызметтер де едәуір қымбаттаған. Сәуір айында 15,7% болған өсім мамырда 16%-ға жетті. Алматы қаласында қызмет көрсету бағасы республика бойынша ең жоғары деңгейге – 22,5%-ға дейін көтерілді. Ал Алматы облысында бұл көрсеткіш 11,3%-ды құрап, ең төменгі өсімдердің бірі ретінде тіркелді.
Мамыр айында айлық инфляция 0,9%-ға өсіп, Ұлттық банк деректері бойынша елдегі баға тұрақсыздығының жалғасып жатқанын көрсетіп отыр.
Сарапшылардың пікірінше, инфляция қарқынының артуы ішкі сұраныстың артуы мен кейбір тауарлар мен қызмет түрлерінің импортқа тәуелділігімен байланысты болуы мүмкін. Ұлттық банк баға тұрақтылығын қамтамасыз ету мақсатында монетарлық саясат құралдарын қайта қарастыруы мүмкін екенін мәлімдеді.
