ҚМА мәліметінше, соңғы уақытта шабуылдаушылар жұмыс орындарына түрлі тексеру туралы жалған хабарламалар жіберіп, қызметкерлерді құжаттар тапсырып, ынтымақтастыққа шақыра бастаған.
«Алаяқтар азаматтардың жұмыс орындарына тексеру жүргізу жөнінде жалған хабарламалар таратып жатыр. Онда құжаттар тапсырып, серіктес болуға шақырады. Хабарламалар ҚМА логотипі бейнеленген жалған бланкіде, қолдан жасалған мөрлермен рәсімделеді,»- деп хабарлады ҚМА баспасөз қызметі.
Осыдан кейін алаяқтар өздерін Қаржы мониторингі агенттігінің қызметкерлері ретінде таныстырып, азаматтарға қоңырау шалып, банк шоттары туралы мәліметтерді алдап сұрап алады.
Агенттік бұл тәсілге қатысты нақты ескертеді:
Қаржы мониторингі агенттігі мұндай тексерулер жүргізбейді және телефон арқылы азаматтарға қоңырау шалмайды.
ҚМА азаматтарды сақ болуға шақырады және күмәнді ақпарат алған жағдайда мынадай әрекеттер жасауға кеңес береді:
-
Ақпараттың шынайылығын тексеру үшін тікелей Қаржы мониторингі агенттігіне немесе тұрғылықты жері бойынша Экономикалық тергеп-тексеру департаментіне жүгіну;
-
Ақпаратты міндетті түрде ресми дереккөздермен салыстыру;
-
Алаяқтардың айласына алданбау.
«Азаматтарды мұқият болуға, күмәнді ұсыныстардан бас тартуға және жалған хабарламаларға сенбеуге шақырамыз», — делінген ҚМА хабарламасында.
Айта кетейік, бұған дейін полиция департаменті жүк тасымалы мен логистика деген сылтаумен жасалып жатқан алаяқтық фактілерінің көбейіп келе жатқанын да ескерткен болатын.
