Жас спортшы өзінің бұл спортқа келгеніне көп болмағанын айтты.
«Армрестлингке 2022 жылы келдім. Бір жыл ішінде Алматы облысының чемпионы атандым, ҚР чемпионатында 3 орын иелендім. Ең соңғы жетістігім Өзбекстанда өткен Әлем чемпионатында бас жүлдені иеленуім болды», – деді Раушан.
Кездесуге құрметті қонақ ретінде жеңіл атлетикадан ҚазКСР-нің 12 мәрте чемпионы болған 93 жастағы спортшы Армия Ушуров шақырылды. Қария спорттың маңыздылығы жайында әңгіме қозғады.
Жалпы бұл мектептің іргесі 1971 жылы қаланған. Мұнда баскетбол, волейбол, футбол, еркін күрес, дзюдо, қазақ күресі, армрестлинг, бокс секілді 11 спорт үйірмесінде 1048 бала жаттығады.
«2024 жылы 134 спортшымыз түрлі біріншіліктерде жүлделі орындарға ие болды. Оның ішінде алтын алғандардың саны – 42. Ғимараттың ескі екені рас. Алайда, жаттығу мен спортқа бейім болу үшін ең алдымен баланың бойында талпыныс болуы қажет. Алдағы жылдарда үлкен спорт кешені ашылады деп жоспарланып отыр. Сол қуанышты жаңалықты асыға күтіп жүрміз», — деді мектеп директоры.
