Видеоға қатысты Павлодар облысының білім басқармасы түсінік берді.
«Бейнебақылау камерасындағы жазбаны қарау кезінде Павлодар қаласындағы №4 балабақшада тәрбиешінің көмекшісі балаға қол жұмсағаны анықталды», — деп хабарлады басқарманың баспасөз қызметі.
9 тамызда №4 балабақша әкімшілігіне баланың анасы қызының аяғы көгергенін айтып шағымданған. Бақылау камерасын қарау кезінде бала аяғын кереуеттің шетіне өзі ұрып алғаны белгілі болды.
«Алайда камералардан жазбаларды одан әрі қарай қараған кезде тәрбиешінің көмекшісі баланы ұрғаны анықталды. Бұл жағдай 9 тамыз күні ұйықтайтын бөлмеде балаларды күндізгі ұйқыға жатқызу кезінде болған», — деп түсіндірді білім бөлімінің өкілі.
Осыған орай мектепке дейінгі ұйым басшысының міндетін атқарушыдан, тәрбиеші көмекшісінен түсініктеме алынды. Жұмыс берушінің бастамасымен тәрбиешінің көмекшісімен еңбек шарты бұзылған.
Дұрыс бақыламағаны үшін мекеме басшысының міндетін атқарушыға сөгіс түрінде тәртіптік жазалау шаралары қабылданған.
Сонымен қатар бақылау жасамағаны үшін мекеме басшысына сөгіс жарияланды. Облыстық полиция департаментінің баспасөз қызметінің мәліметінше бұл факт бойынша іс тіркелді.
