Reuters агенттігінің хабарлауынша, қолданбаны ашуға тырысқан қолданушылар TikTok-тың қолжетімсіз екені туралы хабарламаны көреді.
«АҚШ-та TikTok-ты пайдалануға тыйым салатын заң қабылданды. Өкінішке қарай, бұл сіздің TikTok-ты әзірге пайдалана алмайтыныңызды білдіреді. Президент Трамп қызметіне кіріскен соң, TikTok-ты қалпына келтіру үшін бізбен жұмыс істейтінін нақты айтты. Жаңалықтарды бақылап отырыңыз», – делінген қосымшадағы хабарламада.
Ал Трамп TikTok-қа АҚШ-та тыйым салуға 90 күндік мерзім беруді жоспарлап отыр. АҚШ-тың сайланған президенті Дональд Трамп NBC News және ABC телеарналарына берген сұхбатында, бұл туралы инаугурациядан кейін мәлімдеме жасайтынын хабарлады.
«Бәлкім, 90 күнге ұзартамын – өздеріңіз білетіндей, 90 күндік мерзім бар. Біз бір шешім тапқанша, мұны жасаймын», – деді Трамп ABC News арнасына берген сұхбатында.
Жұма күні АҚШ Жоғарғы соты TikTok-қа тыйым салу туралы заңды растады. Заңға сәйкес, TikTok-тың иесі, қытайлық ByteDance компаниясы 19 қаңтарға дейін платформаны сатпаса, қосымшаға тыйым салынады. ByteDance сатып алушыны іздеуден бас тартқан.
Өз кезегінде TikTok өкілдері билік тарабынан кепілдіктер болмаған жағдайда, жексенбі күні АҚШ қолданушыларына қызметті өшіретінін мәлімдеді.
Ал TikTok пайдаланушыларының бұлтты деректерін АҚШ-та сақтайтын Oracle компаниясының басшылығы серверлерді өшіруге дайындалып жатыр, деп хабарлайды Reuters The Information сайтына сілтеме жасап.
