Оның айтуынша, жыл ішінде қаладағы басты көшелерге 1020 «ақылды шам» орнатылған. Бұл шамдар автоматты түрде қосылып-сөну арқылы энергияны үнемдеуді қамтамасыз етеді. Алдағы уақытта тағы 3500 осындай шамды орнату жоспарлануда. Бұдан бөлек, тротуар бойындағы 284 шам мен жаяу жүргіншілер көпіріндегі 47 сәндік шам жаңартылды.
Тозығы жеткен электр желілерін жаңғырту аясында бірнеше ықшамауданда жұмыстар жүргізілді. Атап айтқанда, 18, 19, 20, Спутник және Рауан ықшамаудандарында трансформаторлар жөнделді. Сонымен қатар, 8-10 шағынаудандарында 3 жаңа трансформатор орнатылып, 4 трансформатор жөнделді. Бұл жұмыстар барысында 8000 метр электр сымдары жаңартылып, Арна, Гүлдер, Восточный, 8, 10, 12А және 12Б шағынаудандарының электрмен жабдықтау сапасы айтарлықтай жақсарды.
«Алтын алма» саяжайында да ауқымды жұмыстар жүргізілді: 3 трансформатор орнатылып, 510 жарық бағанасы қойылды және 47 шақырым желі тартылды. Сонымен бірге, 7-ші саяжайдың 21 көшесіне жарық жеткізетін РУ-04 құрылғысының желілері ауыстырылды.
Энергетическая, Набережная көшелері мен 1-5-ші шағынаудандарда көше жарығын қамтамасыз ету үшін 68 жарық бағанасы орнатылды. Мира, Октябрьская, Соболева, Қазыбек би, Гүлдер, Ақжол және МО-25 көшелеріне 70 жаңа шам орнатылды.
Тимур Ақмырзаевтың айтуынша, Рауан ықшамауданындағы электрмен жабдықтау желілерін реконструкциялау бойынша жобалық-сметалық құжаттама әзірленуде. Бұл жоба 2025-2026 жылдары жүзеге асырылады. Сондай-ақ, биыл Спутник ықшамауданындағы жарықтандырылмаған көшелерге жарық бағаналарын орнату көзделген.
ТҮКШ бөлімінің басшысы кешенді даму жоспары аясында электр желілерін жаңғыртуға бағытталған 13 жобаның іске асатынын атап өтті. Бұл жұмыстардың нәтижесінде электр желілерінің тозу деңгейі айтарлықтай төмендемек.
